ფულადი მიმოქცევა XVIII საუკუნის II ნახევრისა და XIX საუკუნის დასაწყისის ქართლ-კახეთში - დამატებითი ცნობები
DOI:
https://doi.org/10.32859/neg/16/168-191საკვანძო სიტყვები:
ქართლ-კახეთის სამეფო, სირმა თეთრი, ქართული ნუმიზმატიკა, ფულადი მიმოქცევა, განძი, მეტა-ანალიზიანოტაცია
ქართლ-კახეთის სამეფოს ისტორიის ანალიზის კუთხით მნიშვნელოვანია ამ ქართული სახელმწიფოს ეკონომიკური ისტორიის შესწავლაც. ამ ქართული სახელმწიფოს ეკონომიკის შესასწავლად ერთ-ერთ ყველაზე მრავალრიცხოვან, ობიექტურ და რაოდენობრივ პირველწყაროდ ნუმიზმატიკური მონაცემები გვევლინება. აუცილებელია შესაბამისი განძებისა (და ცალკეული მონეტების) პოვნის ფაქტების შეძლებისდაგვარად ზუსტი და სრული აღრიცხვა, როგორც შემდგომი მეტა-ანალიზის აუცილებელი წინამორბედი ეტაპი. წინამდებარე ნაშრომის მიზანია 1744-1801 წლების ქართლ-კახეთის სამეფოს ნუმიზმატიკური ისტორიის, კერძოდ, ფულადი მიმოქცევის შესასწავლად ახალი პირველადი მასალის გამოქვეყნება და წინასწარი ანალიზი. ნაშრომში განხილულია XVIII საუკუნის ბოლო მესამედის - XIX საუკუნის პირველი ათწლეულების რვა სამონეტო კომპლექსი. მათ აერთიანებს ფორმირებისა და, შესაბამისად, მათში შემავალი მონეტების მიმოქცევის ტერიტორია - ქართლ-კახეთის სამეფო, შემდეგ რუსეთის იმპერიის მიერ ანექსირებული ქართლ-კახეთი. რვა კომპლექსიდან ხუთი ნაწილობრივ ან ექსკლუზიურად ეროვნული ქართული (ქართლ-კახეთის სამეფოში მოჭრილი) მონეტებისგან შედგება; სამი კი - რუსეთიდან იმპორტირებული რუსეთის იმპერიის მონეტებისგან.
